from Path to Nirvana https://ift.tt/3cnQJN3
https://ift.tt/3hQpgEQ
ඒකාලෙ මම චන්ද්‍රවතී නගරයේ ඉපදිලා හිටියෙ. ජීවිකාව විදිහට කළේ අනුන්ගෙ බැලමෙහෙවරකම්.
අනවමදර්ශී බුදුරජුන් පහලවෙලා හිටපු ඒ කාළෙ මට දන් දෙන්න මුකුත්ම තිබුනෙ නෑ. මම මොනවා කියලා දෙන්නද මම බැලයෙක්. මම කොහොම මේ සසරින් මිදෙන්නද කියලා නිතරම කල්පනා කළා.
දෙන්න දෙයක් නැති නිසා මම කල්පනා කළා සම්පූර්ණ පංචසීලය ජීවිතය පුරාවටම ආරක්ෂා කරන්න. ඉතිං මම අනවමදර්ශී බුදුරජුන්ගෙ නිසභ කියන ශ්‍රාවකයා ගාවට ගිහින් පංසිල් ගත්තා.
ඒ කාලෙ මනුශ්‍ය ආයුෂ ඉතා දීර්ඝයි. මම අවුරුදු ලක්ෂයක් ම එක දිගට කඩ නොකර පංසිල් රැක්කා. කාළය ගත වුනා මම මැරෙන මොහොතත් ලං වුනා. ඒ වෙලාවෙ දෙවියෝ ඇවිත් මාව අස්වැසුවා ඒ කොහොමද, “නිදුකාණෙනි! මේ දහසක් අසුන් යෙදූ රථය ඔබටයි එන්න” කියලා. අවසාන චුති සිතෙන් මම රැක්ක පංචසීලය සිහි කළා. ඒ වෙලාවෙම මම තව්තිසා දෙව්ලොව ඉපැදුනා.
බලන්න ඊට පස්සෙ මම රැක්ක පංසිල් නිසා මට ලැබුනු සැප විපාක.
ශක්‍ර දේවේන්ද්‍රව තිස් වාරයක් මම දිව්‍ය රාජ්‍ය පාලනය කළා. අප්සරාවන් විසින් පිරිවරාගෙන දෙව්සුව වින්දා. හැත්තෑ පස් වාරයක් සක්විති රජ බවට පත්වුනා. ඊට අමතරව ප්‍රදේශ රජ කෙනෙක් විදිහට සිටි ආත්මභාව ගණන මෙච්චරයි කියලා කියන්න බෑ එපමණ වාරක් ප්‍රදේශ රජ බවට පත්වුනා.
ඒ කුසලය මාව අතහැරියේ නෑ දෙව්ලොවින් චුත වෙලා වේසාලී නගරයේ අතිශයින් පොහොසත් මහාසාර කුලයක ඉපැදුනා. වස් එළැබෙන කාළයේ දෙමාපියන් එක්ක මමත් ගියා. එයාලා පංසිල් ගන්නකොට මට ඒවා හොඳින් ඇසුනා. මට වයස අවුරුදු පහක් විතරයි. පන්සිල් ඇසෙනවාත් සමග සමථ විදර්ශනා නුවන මේරීමෙන් ඉදගෙන ඉදපු ආසනේම ක්ෂණිකව රහත්බව ලැබුවා.
උප්පත්තියෙන් පස් හැවිරිදි වියේම මම රහතන් වහන්සේ කෙනෙක් වුනා. ප්‍රඥාවෙන් උත්තම වූ බුදුරජුන් මේ බව දැනගෙන මාව උපසම්පදා කළා.
මීට අප්‍රමාණ කල්ප ගණනකට ඉහත කළ ඒ කුසල කර්මයෙන් ලැබූ සැපවිපාක මෙච්චරයි කියලා කියාගන්න බෑ. ඒ ආත්මභාවයේ සිට මේ දක්වාම මම දුගතියකට ගියේ නෑ. පංසිල් රැකීමෙන් විශේෂ වූ ආනිසංස තුනක් මම නිතරම ලැබුවා. ඒවා තමා නිතරම දීර්ඝායුෂ වුනා, මහත් වූ භෝග සම්පත් ලැබුවා, තීක්ෂණ වූ ප්‍රඥාව ලැබුවා.
පන්සිල් රැකීමේ අනුසස් මෙහෙම නම් බුද්ධ ශ්‍රාවකයන් රකිනා උතුම් සීලයෙහි අනුසස් කොහොම වෙයිද?
නිකම්ම නිකම් බැලයෙක් වුන මම මනාකොට පන්සිල් රැකලා අද සියළුම භව බන්ධන වලින් මිදුනා. සිව් පිළිසිඹියාවන්, අෂ්ට විමෝක්ෂයන්, ෂඩ් අභිඥාවන් මම ලැබුවා. ගෞතම මුනිඳුන්ගේ සාසනයත් මම කරගත්තා.
මේ අයුරින් ආයුෂ්මත් පංචසීල සමාදානිය තෙරුන් විසින් සිංහනාද කරන ලදී.
(පංඤ්චසීලසමාදානිය ථේරාපදානය – සුභූති වර්ගය)