from Path to Nirvana https://ift.tt/2OJerqh
එක් දිනක් භාග්‍යවතුන් වහන්සේ මහත් වූ භික්ෂු සංඝ්‍යා වහන්සේලා පිරිවරා චාරිකාවේ වැඩියා. භාග්‍යවතුන් වහන්සේ වඩින මාවතේ උන්වහන්සේට මුහුණ ලා ඉදිරිපසින් පාරේ අනෙක් පසින් එක්තරා ගව ඝාතකයෙක් ගවයෙක් රැගෙන පැමිණියා.
දුරදී සංවරව ආපු ගවයා භාග්‍යවතුන් වහන්සේ ආසන්න වෙනවාත් සමග එකපාරටම අර මනුස්සාවත් ඇදගෙන ඇවිත් භාග්‍යවතුන් වහන්සේගේ පා මුල දනගහගෙන ශ්‍රී පාද ලෙවකන්නට පටන් ගත්තා.
සකළ සත්ත්වයන් කෙරෙහිම කරුණාභරිත හදවතින් වැඩ සිටින භාග්‍යවතුන් වහන්සේට මේ ගවයා කෙරෙහි මහත් වූ කරුණාවක් හටගත්තා. ඉතින් භාග්‍යවතුන් වහන්සේ අසා සිටියා “පුරුෂය නුඹට මේ ගවයා නිදහස් කරන්න පුළුවන්ද?”
“ස්වාමීණි මම ජීවත් වෙන්නේ මේ කර්මාන්තයෙන් මේ ගවයා මරලා මස් විකුණලා ලැබෙන මුදලින් තමා මම වෙනත් ගවයෙක් ගන්නෙත් අඹු දරුවන් ජීවත් කරන්නෙත්. ඉතිං මේ ගවයා දුන්නොත් මට ජීවත් වෙන්න ක්‍රමයක් නැති වෙනවා.
“හොදයි එහෙනම් නුඹට මේ ගවයා වෙනුවෙන් කොපමණ මුදලක් ඕනද?”
“ස්වාමීනි මසුරන් දහසක් පමණ”
ඉතින් ඒ වෙලාවේ භාග්‍යවතුන් වහන්සේ අධිෂ්ඨාන කලා කවුරුන් හෝ මසුරන් තුන් දහසක්ම රැගෙන පැමිනේවා කියලා. භාග්‍යවතුන් වහන්සේගේ චිත්ත පරිවිතර්කය දැක්ක ශක්‍ර දේවේන්ද්‍ර එවෙලේම මසුරන් තුන් දහසක් රැගෙන මිනිස් වෙසින් භාග්‍යවතුන් හමුවේ පෙනී සිටියා.
“කව්ශික ඔය මසුරන් තුන්දාහ දීලා ගවයා නිදහස් කරන්න” කියලා භාග්‍යවතුන් වහන්සේ කිව්වා. මිනිසුන්ට කෙලෙහිගුණ අමතක උනාට සත්තුන්ට එහෙම නෑ. මේ ගවයාත් ආයෙ කොහේවත් යන්නේ නැතුව භාග්‍යවතුන් වහන්සේ පිටුපසම චාරිකාවේ ගොස් ආපසු ආපසු ආවා. ඉතිං ඔය අතර එක වෙලාවක භාග්‍යවතුන් වහන්සේ මේ ගවයා දෙස බලා සිනහවක් පහල කලා. බුදුවරු නිස්කාරනේ සිනහ පහල නොකරණ බව දන්නා ආනන්ද හිමි භාග්‍යවතුන් වහන්සේ සිනහ පහල කල කාරනය කුමක්දැයි ඇසුවා.
“ආනන්ද මේ ගවයා නුඹට පේනවා නේද?”
“එහෙමයි ස්වාමීනි පේනවා”
“ආනන්ද මේ ගවයා තව නොබෝ දිනකින් මරණයට පත්වෙනවා. මරණයට පත්වන මේ ගවයා චාතුම්මහාරාජික දෙවියන් අතර උපදිනවා. ඉන් චුත වී තාවතිංස දෙවියන් අතර උපදිනවා. ඉන් චුත වී තුසිත දෙවියන් අතර උපදිනවා…….. මේ ආකාරයට ඉහලින් ඉහල දෙව්ලෝ සියල්ලේ උපදිනවා. අවසානයට පරිනිම්මිත වසවර්ති දෙවියන් අතර ඉපිද ඉන් චුත වී මනුලෝ ඉපිද පසේ බුද්ධත්වයෙන් සියළු දුක් කෙලවර කරන්නේය…..” යැයි නියත විවරණයකුත් දුන්නා.
එවිට ආනන්ද හිමි… “ස්වාමීණි ඒකාන්තයෙන් ආශ්චර්‍යයි…. ඒකාන්තයෙන් අත්භූතයි…. මෙච්චර දෙයක් ලබන්න මේ තිරිසන් සතා කල පින මොකක්ද?
“ආනන්ද වෙන මොකුත් නෙමෙයි තථාගයන් වහන්සේ තමයි මට සැගවෙන තැන, පිළිසරණවෙන තැන, පිහිටට ඉන්න තැන ලෙස මේ සතා සිතූ සිතිවිල්ලමයි මේ සතා කල එකම පින…….”
හරියට සිහි කල්පනාවක් නැති තිරිසන් සතෙක්ට භාග්‍යවතුන් වහන්සේ පිළිබද පහන් සිතිවිල්ලකින් මේ සා විපාක ලබාගන්න පුළුවන් වුනානම් මනුශ්‍ය වූ අපට කොහොම පින් කරගන්න පුළුවනිද?

(අතිපූජ්‍ය නම ලියන්න අවසර, මාන්කඩවල සුදස්සන හිමියන්ගේ දෙසුමකින් උපුටා ගැණුනි.)