from Path to Nirvana https://ift.tt/2A2tkxT
අභියාචනයක්

” මහ ගුණැති දුටුගැමුණු රජතෙමේ තෙරුන් බස් අසා මහසෑය බලමින් හොත්තේ, ඇස්පියා ගත්තේය. එකෙනෙහිම මෙයින් චුතව තුසිත දෙව්ලොව උපන්නේය.”
( මහාවංශය )

ඉහත සඳහන් මහාවංශ පාඨයට අනුව දැන් තුසිත දෙව්ලොව වැඩ වසන දුටුගැමුණු දිව්‍යරාජයාණනි,

ඔබතුමා නිසා සිංහල ජාතියත්, බුද්ධ ශාසනයත් ගැලවුනේය. බේරුනේය. ආරක්ෂා වුනේය. කෙසේ හෝ අද දක්වාම පවත්නේය. එය එසේ නොවේයයි මේ රටේ කිසිවෙකුටවත් කිව නොහැකිය. සිංහල ලෙයට ජාත්‍යාලය, ආගමාලය, දේශාලය හා සංඝ ගෞරවය අතුල් කළේ, අඩංගු කළේ, කාවැද්දුවේ ඔබතුමාය. පසුගිය අවුරුදු 2000 තුළ මේ රටේ සිංහලයනි අතර වළගම්බා, මහසෙන්, මහා විජයබාහු, මහා පරාක්‍රමබාහු, රාජසිංහ ආදි ශ්‍රෙෂ්‍ඨ රජවරුන් පහළවුයෙත්, මහාකාශ්‍යප, ධර්මකීර්ති වනරතන, ශ්‍රී රාහුල, වැලිවිට ශ්‍රී සරණංකර, වැනි සංඝ රාජවරුන් පහළවූයේත්, කැප්පිටිපොළ, වාරියපොළ සුමංගල, මද්දුම බණ්ඩා, අනගාරික ධර්මපාල, හැන්රි පේද්‍රිස් වැනි වීරවරයන් බිහිවුයේත් නිදහසින් පසු මේ රටේ මැති ඇමැතිවරුන්, අගමැතිවරුන් හා ජනාධිපතිවරුන් ඇතිවුයේත් ඔබ තුමාට පිංසිදුවෙන්නටය. ඔබතුමා ජාතියත්, ආගමත් රටත්, රැක ගත් නිසාය. ඔබතුමා අතිකළ දුටුගැමුණු සංස්කෘතිය නිසාය.

අනේ, අපේ දුටුගැමුණු මහ රජතුමනි, ඔබ තුළත්, ඔබ තුමාගේ දසමහා යෝධයන් තුළත්, මැති ඇමැතිවරුන් තුළත් එකල විසු සියලුම රටවැසියන් තුළත් ඔබතුමාට අනුශාසනා කළ මහා සංඝයාතුළත් එදා තිබුණු ජාත්‍යාලයෙන්, ආගමාලයෙන් දාහෙන් පංගුවක් වත් අද සිටින අප තුළ නැත. අපේ සිංහලයන් තුළ නැත. ඔබතුමා ජීවිත පරිත්‍යාගයෙන් රැකගත් සිංහල ජාතිය අද දහසක් ඛේදවලින් කැඩී බිදී වෙන්වී දුබලවී අසමගි වී තිබේ. “ මේ අපේ මිනිස්සුය. මේ අපේ රටය. මේ අපේ පොළොවය. මේ අපේ ආයතනය. මේ අපේ යානවාහනය. මේ අපේ රජයයි.” අවංකව සිතන අය අප අතර ඇත්නම් එය ඉතාම ටික දෙනෙකි. මේ රටේ සුළු ජාතිකයෝ දිනෙන් දිනම දියුණු වෙති. ඔවුහු ඉතාම සමගියෙන් සිටිති. ඒ ගැන අපි කිසිම ඊර්ෂිය්‍යාවක් අකැමැත්තක් ඇත්තේම නැත. සියළුම වැරැදි ඇත්තේ සිංහලයන් වූ අප අතේය. නිර්භීත පෞඪ ජාතියක් වූ අපේ සිංහල ජාතියේ ආත්ම ගෞරවය අප විසින්ම විකුණනු ලැබ ඇත. ඔබතුමන්ගේ කාලයේ සිංහල කාන්තාවෝ යුද පෙරමුණේ ගියහ. චීනය වැනි දුර රටවලට ධර්ම දූතයන් වශයෙන් ගියහ. සංස්කෘතික තානාපතීන් මෙන් ක්‍රියා කළහ. එහෙත් අද අපෙ මව්වරු තම ආදරණීය දරුවන් විදේශිකයන්ට විකුණා මුදල් ලබා ගනිති. අපේ තරුණ කාන්තාවෝ මැදපෙරදිග රටවලට ගොස් එහි නිවෙස්වල වැඩකාරකම් කරති. මේ රටේ මහජන මුදලින් නොමිලේ ඉගෙන ගෙන වෛද්‍ය,ඉංජිනේරු ආදී උසස් විභාග පාස් කොට වැඩි පඩියට පිට රටවලට ගොස් සේවය කරති. මුදල් වැඩියෙන් ඇති රටවල් අපේ රටේ දක්ෂ බුද්ධිමතුන් මිළදීගෙන ඇත. ඔවුහු සිය රට හැරගොස් අනුන්ට බැල මෙහෙ කරති. තම රටට කළ යුතු සේවය පිටරටවලට ගොස් සිදු කරති.
ඔබතුමා ජීවිත පරිත්‍යාගයෙන් ආරක්ෂාකළ ඒ උතුම් සිංහල බෞද්ධ සංස්කෘතිය වාණිජ සංස්කෘතියට යටවී විනාශවේගන යයි. පක්ෂ දේශපාලනය නිසා අසමගියෙන් හා පළිගැනීමෙන් මුළු ජාතියම සියදිවි නසා ගන්නා තත්වයට වැටී ඇත. අවුරුදු 2500ක් පැරැණි ජාතියක් මේ රටේම සුළු ජාතියක් බවට පත්වීමෙ අතිශය ශෝචනීය ලකුණු පහළ වී ඇත.

අපේ ශ්‍රෙෂ්ඨතම මහා වීරයාණෙනි,

ඔබතුමා මෙතේ බුදුරදුන් දවස ඉපදී නිවන් දකින්නට පෙර, නැවතත් මේ රමණීය දූපතේ. මෙ සිංහල රටේ. ඔබ ඉපිද, හැදුණු, වැඩුණු, මැරුණු මේ ඔබේ බෞද්ධ රටේ, ඉපිද, මේ උතුම් රට විපතින් බේරගන්නා ලෙස ඔබතුමාගේ රුවන්වැලි මහා චෛත්‍යය රාජයා ගේ නාමයෙන් විහාරමහාදේවීන් වහන්සේගේ නාමයෙන් ඉල්ලා සිටිමි.

මීට ගණේගම සරණංකර නාහිමි.