from Path to Nirvana https://ift.tt/2mb42dx
කර්මයේ ගුප්ත විපාක
ආචාර මන් චියාං මයි කඳුකරයේ වාසය කරන කල්හි මධ්‍යම රාත්‍රිය පසුවන විට එක්තරා සංඥාවක් දකී. එනම් කාන්තාවක් සහ කුඩා සාමණේර නමක්. මේ ගැන විපරම් කිරීමට සිතා කුමක් නිසා මෙසේ දිනපතා එහෙ මෙහෙ යන්නේ දැයි විමසුවේය. ඒ අය කනස්සල්ලෙන් ජීවත් වෙති. ඊට හේතුව ගිය ආත්මයේ දී එක්තරා ස්ථූපයක් ගොඩ නැංවීමට දෙදෙනා වෙර වැඩූහ. එහෙත් එය නිම කිරීමට ප්‍රථම මරණයට පත්වුණි කුඩා සාමණේර නම එම ස්ත්‍රිය ගේ බාල සහෝදරයා විය. මේ සිද්ධිය ගැන බලවත් කම්පාවක් හා පසුතැවිල්ලක් නිසා මෙසේ උපතක් ලදහ. එහෙත් ඒ දෙදෙනා දුක් විඳින්නේ නැත. නමුත් සැප ඇති භවයක ඉපදීමට කැමැත්තක් ද නැත.
ආචාර්ය මන් ඔවුන්ට ධර්මය දේශනා කළහ. පසුගිය දේ ගැන තැවෙන්නට එපා ඒ ගැන කිසි දෙයක් කරන්ට බැහැ. හිතුවට වැඩක් නැත. ඔරලෝසුව ආපසු කැරකීමක් වැනිය. එසේ සිතීම නිසා මහත් වූ දුක, බය, සැක හටගනී අසහනය ඇති වේ. කෙතරම් ප්රාර්ථනා කළත් නොලැබේ. අනාගතය ගැන සිතීමද වැරදියි අනාගතය තාම ඇවිත් නැත. එබැවින් අතීතය හා අනාගතය අත්හරින්න. වර්තමානයේ පමණක් යමක් කළ හැකි වේ.
ඔබට ස්තූපය නිමකරන්නට නොහැකි වීමට හේතු ඇත. ඒ හේතු නොතිබුනා නම් ඔබ මරණයට පත් වන්නේ නැත. මරණය සාමාන්‍ය දෙයකි. එය ඉක්මවීමට නොහැකිය. දැන් එය සෑදීමට කෙතරම් සිතුවත් එය කළ නොහැකිය. තව තව සිතීමෙන් තව තව වැරදි සිදුවේ. මේ නිසා ඔබට හොඳ උත්පත්තියක් නොලැබේ.
ස්තූපය ගොඩනැංවීමෙන් බලාපොරොත්තු වන්නේ පින් ලබා ලබා ගැනීමටයි. එහි ඇති වැලි සිමෙන්ති වලින් වැඩක් නැත. ඔබ ගත් මහන්සිය නිසා කුසල් චේතනා ඇති වී පින් රැස් වේ. මේ පින පමණයි ඔබට අත් වන්නේ. ගල් වැලි වලින් වැඩක් නැත හොඳ දේ කරන සියලු දෙනාම ගෙනියන්නේ පින් පමණයි. තමන් දුන් භෞතික දේ ගෙනියන්නේ නැත. පන්සලක්, භික්ෂු ආවාසයක්, භාවනා, ශාලාවක්, වතුර ටැංකියක්, පොදු ගොඩනැගිල්ලක් හෝ යම්කිසි ද්‍රව්‍යමය දෙයක් ආදිය බාහිර වස්තූන් ය. ඒවා දීමට ඇති චේතනාව නිසා තම මනසේ පින් සිත් ඇති වේ. එහි විපාක ඔබ ගෙනියති. ද්‍රව්‍යමය දේ කලක් යන විට විනාශ වී යයි. මේවා ද්‍රව්‍ය පමණි. එහි දේව ලෝකයක් හෝ අපායක් නැත. ඒවා දුන් චේතනාවේ කුසලකර්ම හටගනී එහි විපාක ගෙන යති.
දන් දීමට ඇති කැමැත්ත මහන්සිය නිසා තම සිතේ කුසල් ඇති වේ. එහි චේතනාව හොඳ බැවිනි. හදවත ගුණවත්ය. හදවතේ පින් රැස් වේ. හදවත් දේව ලෝකය වේ, නිවන වේ, මග පල වේ මේ සියල්ල ඇතිවන්නේ හදවතේ හෙවත් සිතේ.
ඔබ ස්තූපය සෑදීමේදී ඔබේ සිතේ තණ්හාවක් ඇති වී තිබේ. හොද දෙයක් ගැන වුණත් තණ්හාව පහළ වේ. එබැවින් එහි ඇල්ම බැල්ම ඇති වේ. ඒ නිසා ඔබ තවමත් එහි ඇලී ගැලී සිටිති. තමා කරගත් පින නිසා සතුටු වූවා නම් ඔබ හොඳ භවයක උපදිනවා. පින් කවදාවත් පව් වෙන්නේ නැහැ. පින් යනු අකාලික ගුණය කි.
අතීතය ගැන තැවෙන්න එපා. එසේ සිතමින් තම කාලය නාස්ති කරන්න එපා. හරි විදිහට හිතන්න බය සැක දුරු කරන්න. වර්තමානයේ වාසය කරන්න. එවිට මගඵල නිවන ලැබේ. අතීතය හා අනාගතය ඔබේ දියුණුව වළක්වයි.
ඔබ දෙදෙනා ගැන මට හරි සංවේගයි. ඔබ හොඳ කර්මයක් කර ඇත. එහෙත් ගල් වැලි වලට තණ්හාව උපදවාගෙන ආසා කර ඇත. ඒ ආසාව නැති කරගන්න. ඔබේ කුසල් විපාක එවිට පලදෙයි. ඉන්පසු ආචාර්ය මන් පන්සිල් විස්තර කළහ.
1. සෑම ජීවියෙක්ම තම ජීවිතයට ප්‍රිය කරති එබැවින් පර පණ නැසීමෙන් වලකින්න.
2. සෑම දෙනාම තම අයිති දේවලට ප්‍රිය කරති. ඒවා එතරම් වටිනා නොවූවත් අයිතිකාරයාට එය වටින්නේය. හොර සිතින් අනුන්ගේ දේ ගැනීම නිසා තමාගේ සිත දූෂිත වේ.
3. ස්වාමි-භාර්යා දූ දරු මා පිය ආදීන් එකිනෙකාට ආදරය කරති. තමාගේ ආදරවන්තයින් අන් අය පැහැර ගන්නවාට අකැමැති වෙති. ඒ අයගේ පුද්ගලික අයිතිය ගරු කළ යුතුය. ස්වාමි භාර්යාවන් අන් අය සමඟ අනාචාරයේ හැසිරීම මහත් දුක් දෙන්නකි. එය මහා පාපකර්මයකි.
4. බොරුව නිසා විශ්වාසය බිඳ හැලේ පෞරුෂත්වය නැතිවේ. සතුන් වත් බොරු රැවටිල්ල නොකරති. බොරුවෙන් වංචාවෙන් වලකින්න.
5. මත්පැන් මත්ද්‍රව්‍ය සිහි විකල් කෙරේ. හොඳ සිහිය ඇති පුද්ගලයා වුවද බීමත්කම නිසා ශාරීරික මානසික රෝගීන් වෙති. තමන් සහ තම ආදරවන්තයින්, අසල්වාසීන් විනාශ වෙයි.
මේ පන්සිල් රැකීම නිසා මහත් ඵල ප්‍රයෝජන ලබා ගත හැකිය. පළවෙනි ශික්ෂාවෙන් දීර්ඝායුෂ ලැබේ. දෙවැනි ශික්ෂාවෙන් තම අයිතිවාසිකම් රැකේ. තුන – තම පවුලේ ආදර භක්තිය තහවුරු වේ. හතර – තම වචන සත්‍ය වූ විට මිනිසුන් සහ දෙවිවරු ගරු කරත්, ආදර කරත් අවංක අයගෙන් කාටවත් හිරිහැරයක් නැත. පහ – මත්පැන් නොබොන අය දක්ෂ වේ. නුවණ ඇති වේ. නොරැවටේ. මොළය අවුල් නොවේ.
මේ පස් පවින් වැළකෙන අය මිනිසාගේ ජීවිතය සමගි සම්පන්න කරත්. විශ්වාසවන්ත කරත්. පස් පව් කරන්නා සතුන්ට මිනිසාට අසීමාන්තික දුක් පීඩාපීඩා දේ. තමන්ගේ ජීවිතයට ආදර මෙන්ම, අනුනුත් තම ජීවිත වලට ආදර කරත්. එබැවින් කිසිවෙකුට දුක් කරදර දෙන්ට එපා. සිල්වත් හොඳ ගතිගුණ නිසා ස්වර්ගයේ උපදී. මේ ධර්ම දේශනාව මතක තබා ගන්න. ඒ අනුව පිළිවෙත් පුරන්න.ඔබගේ අනාගතය ඒකාන්තයෙන් සඵල වේ.
එම කාන්තාව සහ කුඩා සාමණේරයන් මේ ධර්මය ඉතා සතුටින් අසා සිටියහ. උන් වහන්සේගෙන් පන්සිල් ඉල්ලූහ. උන්වහන්සේ පන්සිල් දුනි. ඉන්පසු ඉතා ගෞරවයෙන් අවසර ගෙන අතුරුදහන් විය. මේ දෙදෙනාගේ ඉහත කුසල කර්ම බලයෙන් ද බණ අසා පන්සිල් රැකීම නිසා ද මිය ගොස් තව්තිසා දෙව්ලොව උපත ලැබූහ.
ඉන්පසු මේ දෙවිවරු දෙදෙනා නොකඩවාම ආචාර්ය මන් හමුවීමට අවුත් තම ප්‍රීතිය ගැන කියා ස්තුති කරති. මෙපමණ කලක් දෙව් ලොව සැප සම්පත් විඳීමට තිබූ ආශාව දැන් මුදුන්පත් විය. තණ්හාව ආශාව ඉතා භයංකර බව ඔවුන්ට වැටහෙන බව කීහ. ඒ නිසා හොඳ ආත්මයක් නොලැබේ. උන්වහන්සේගේ ධර්මාන්විත උපදෙස් ලබාගෙන දෙව්ලොව උපත ලදහ.
ආචාර්ය මන් ධර්ම දේශනා කරමින් බලවත් හැඟීම්, උද්වේග, ආවේග ඇති කර ගැනීම නුසුදුසු බවත් එය මරණාසන්න මොහොතේ දී බලපාන බවත් පහදා දුන්හ. යමෙක් සමග ඇති කරගත් ප්‍රේම සම්බන්ධතා හෝ වෛර, ක්‍රෝධ, පළිගැනීම් වැනි බලවත් උද්වේග සිත අල්ලා ගනිති. සිත තම කය අත් හරින විට මෙවැනි උද්වේගයෙන් සිහිපත් වුවහොත් ඊළඟ ආත්මය අපාය ලෝක යක්ෂ, ප්‍රේත හෝ තිරිසන් ආදී දුක්ඛිත තත්වයට පත්වේ.
එබැවින් අපි සිහි කල්පනා ඇති මනුෂ්‍ය ලෝකයේ වාසය කරන විට නිතරම තමා ගේ සිත ගැන විමසිලිමත් විය යුතුයි. මනුෂ්‍යයන් වශයෙන් අපි නිවැරදි අවබෝධය ඇති කර ගෙන ඒවායින් මිදීමට මහන්සි දැරිය යුතුයි. එවිට අවසාන මොහොතේ දී මරණාසන්න වූ විට හොඳාකාර සිතුවිලි පවත්වන්නට හැකි වේවි. එබැවින් නිතරම හොඳ සිතුවිලි ඇති කර ගන්න. ඇලීම් ගැටීම් වලින් ඈත් වෙන්න. සියලූ බන්ධනයන්ගෙන් මිදුණු තරමට අවසාන මොහොත සතුටින් තම කය දමා ගිය හැකි ය.
නුවණැත්තෝ හදවත යනු ඉතාම වටිනා අවයවය බව දනිති. හදවත පිරිසිදු නම් මානසික ශාරීරික සුවය ගෙන දේ. එබැවින් නුවණ ඇති බුදුන් රහතුන් වැනි උත්තමයෝ තමාගේ හදවත පිරිසිදු කර අනුන්ටත් තම හදවත පිරිසිදු කිරීමට උපදෙස් දෙති. අපේ ජීවිතය රඳා පවතින්නේ හදවතේය. අපේ සතුට, සැනසීම, දුක, තරහ, වෛර ඇතිවන්නේ හදවතේ ය. ඉන් කුසල් අකුසල් කර්ම සිදු වේ. එම කර්මය අනුව නැවත උප්පත්තිය සිදුවේ. මෙසේ හදවත ඉතා ප්‍රබල ඉන්ද්‍රියකි. අප අපායට දමන්නේත් ස්වර්ගයට දමන්නේත් හදවතයි. එබැවින් හදවත නිතරම හොඳ දේ සිතන්නට පුහුණු කළ යුතුයි.
ආචාර්ය මන් බණ කියා අවසන් වූ විට අලුත උපන් දෙවිවරු දෙදෙනා අධික ප්‍රීතියට පත් වූහ. ප්‍රශංසා කරමින් නොයෙක් විදියේ වර්ණනා කරමින් ඉන්පසු තුන්වරක් ප්‍රදක්ෂිණා කොට පසුපසට ගමන් කර පුලුන් රොදක් මෙන් අහසේ පාවී ගියහ.
(ආචාර්ය මන් භූරිදත්ත රහතන් වහන්සේගේ ආධ්‍යාත්මීය චරිතාපදානය පොතෙන් උපුටා ගැනුනි)
Path to Nirvana පේජය සඳහා සකස් කළ මෙම දහම් ලිපිය මිතුරන් අතරේ share කර ධර්ම දානමය කුසලයට ඔබත් සහභාගී වන්න.
