from Path to Nirvana https://ift.tt/2pj4eJL
🧡💛 අපේ බුදුහාමුදුරුවෝ 94 🧡💛

රන් වැසි දඹදිව පුරා වස්වමින් මෙලොවට පහල වු කෝණාගමන බුදුහාමුදුරුවෝ 01

කකුසඳ බුදුරජාණන් වහන්සේ පිරිනිවුණායින් පසුව මිනිස්සුන්ගේ ආයුෂ නැවතත් පිරිහෙන්නට වුනා. ඒ පරමායුෂ වසර දහය දක්වා. නැවතත් වසර දහයේ සිට අසංඛ්‍යය දක්වා වැඩිවූ පරමායුෂ අවුරුදු තිස්දහසක් පිරිහුණ කාල පරිච්චේදයේ කෝනාගමන භාග්‍යවතුන් වහන්සේ මෙලොවට බිහිවුණා. උන්වහන්සේත් පෙරුම් පුරමින් පැමිණ අවසානයේ තුසිත දෙවු ලොව ඉපිද දෙවාරධනයෙන් පසුව එයින් චුතවී සෝභවාති නුවර පඤ්ඤදත්ත බ්‍රාහ්මණයාගේ භාර්යාව වූ රූපාදී ගුණයෙන් අනුත්තර වූ උත්තරා නම් බැමිණියගේ කුසතුල පිළිසිඳ ගත්තා.

සෝභවාති නුවර අසල ඒ නමටම සරිලන සෝභමාන උයනක් තිබුණා සුභගවතී කියලා. දසමසක් ඇවෑමෙන් පස්සේ කෝණාගමන බෝධිසත්වයන් වහන්සේ සුභගවතී උයනේදී තමයි මෙලොව එළිය දුටුවේ. ඒ බොසතාණන් වහන්සේ ඉපදෙන විටම මුළු දඹදිව පුරාවටම රන් වරුසාවක් වහින්නට පටන් ගත්තා. ඒ උන්වහන්සේගේ පුණ්‍ය මහිමයට. එලෙස රන්වැසි පැමිණි නිසාම උන්වහන්සේට නම් තබන්නෝ නම් තබන දිනයේ කනකාගමන යැයි නම් තැබුවා. පසුකාලයේ ඒ නම කෝණාගමන යනුවෙන් පරිණාම වුනා කියලා අටුවාවේ කියනවා.

උන්වහන්සේ අවුරුදු තුන්දහසක් ගිහිගෙයි වාසය කරනවා. ඒ තුසිත සන්තුසිත සන්තුට්ඨි නම් දිව්‍ය සැප බඳු ලෞකික සැප ඇති තුන් පහයන් තුල. රුචිගත්තා බ්‍රහ්මණිය පරමුඛ දහසයදහසක් වු ස්ත්‍රීන් උවැටන් කරනු ලබනවා. එහෙත් උන්වහන්සේත් සතර පෙර නිමිති දැක රුචිගත්තා බ්‍රහ්මණියට සත්ථවාහ නම් පුතු උපන් දිනයේම ගිහිගෙයින් නික්මෙන්නේ ඇත්යානයකින්. ඒ තනියම නෙවෙයි. තිස්දහසක පිරිවරත් සමග.

❤💚💛🧡 විශේෂ පුණ්‍යානු මෝදනාව – මෙය බොහෝ බෞද්ධ ජනයා අතරට ගෙනයාමට ස්වකැමැත්තෙන් ඉදිරිපත් වූ Path to Nirvana පිටුව නිර්මාතෘ කල්‍යාණ මිත්‍ර ජනකට සහ හැකි සෑම විටකම මෙහි රූප රාමු සකසා මගේ හිසේ බරෙන් අඩක් නිදහස් කිරීමට පොරොන්දු වූ තිලංක විජේසිංහ කල්‍යාණ මිතුරාට. ❤💚💛🧡

තුසිත රාජපක්ෂ
ප්‍රංශය
14-11-2019